மணிரத்னம் இயக்கத்தில் பிரம்மாண்டமாக உருவாகி வரும் ‘பொன்னியின் செல்வன்‘ படத்தை இந்திய சினிமாவே எதிர்பார்த்து காத்து கொண்டிருக்கிறது. எழுத்தாளர் கல்கி கிருஷ்ணமூர்த்தி எழுதிய புகழ்பெற்ற நாவலான ‘பொன்னியின் செல்வன்’ கதை அதே பெயரில் படமாக உருவாகி வருகிறது. இந்நிலையில் இந்த படத்தின் படப்பிடிப்பிற்காக மத்திய பிரதேசம் விரைந்துள்ளனர் படக்குழுவினர்.

விக்ரம், ஜெயம் ரவி, கார்த்தி, ஐஸ்வர்யா ராய், ஐஸ்வர்ய லட்சுமி, த்ரிஷா, பிரபு, சரத்குமார், விக்ரம் பிரபு, கிஷோர், ஜெயராம், லால், ரகுமான் உள்ளிட்ட பல மொழிகளை சேர்ந்த பிரபல நட்சத்திரங்கள் நடிக்கும் ‘பொன்னியன் செல்வன்’ படம் தமிழ், தெலுங்கு, மலையாளம், இந்தி உள்ளிட்ட மொழிகளில் உருவாக்கப்பட்டு வருகிறது. இந்தப்படத்தை பிரம்மாண்டமாக இரண்டு பாகங்களாக உருவாக்குகிறார் இயக்குனர் மணிரத்னம்.

மெட்ராஸ் டாக்கிஸ் நிறுவனமும், லைக்கா நிறுவனமும் இணைந்து தயாரிக்கும் இந்த படத்திற்கு இசைப்புயல் ஏ.ஆர்.ரஹ்மான் இசையமைக்கிறார். இந்நிலையில் கொரோனா இரண்டாம் அலை காரணமாக நிறுத்தி வைக்கப்பட்ட ‘பொன்னியின் செல்வன்’ படத்தின் படப்பிடிப்பு கடந்த மாதம் மீண்டும் துவங்கியது. ஹைதரபாத்தில் நடைபெற்ற இந்த படப்பிடிப்பு அண்மையில் நிறைவடைந்தது.

அண்ணாத்த, வலிமை வரிசையில் ‘பீஸ்ட்’: தீபாவளி தினத்தில் விஜய் ரசிகர்களுக்கு காத்திருக்கும் விருந்து!
இந்நிலையில் அடுத்தக்கட்ட படப்பிடிப்பிற்காக மத்திய பிரதேச மாநிலம் விரைந்துள்ளனர் படக்குழுவினர். அங்குள்ள ஓர்ச்சா எனும் பகுதியில் அடுத்தக்கட்டப் படப்பிடிப்பை நடத்த திட்டமிட்டுள்ளனர். மிகவும் பழமையான நகரமான ஓர்ச்சா மத்திய பிரதேசத்தின் அரண்மனை நகரம் என்று அழைக்கப்படுகிறது. முழுக்க முழுக்க அரண்மனைகளும் கோவில்களுமே நிரம்பியுள்ள இங்குதான் பொன்னியின் செல்வன் படத்தின் அடுத்தக்கட்ட படப்பிடிப்பு நடைபெற உள்ளது.

பொன்னியின் செல்வன் படப்பிடிப்பில் கலந்துகொள்வதற்காக மத்திய பிரதேசம் கிளம்பியுள்ள பிரகாஷ் ராஜ், விமான நிலையத்தில் கார்த்தி மற்றும் மணிரத்னம் உடன் இருக்கும் புகைப்படத்தை தனது ட்விட்டர் பக்கத்தில் பகிர்ந்துள்ளார். இந்த புகைப்படம் தற்போது இணையத்தில் வைரலாகி வருகிறது. இதுவரை இந்த படத்தின் 80 சதவீத படப்பிடிப்பு நிறைவடைந்துள்ளது குறிப்பிடத்தக்கது.