இந்தியன் 2 பட வேலை தாமதமானதற்கு தான் காரணம் இல்லை என்று இயக்குநர் ஷங்கர் சென்னை உயர் நீதிமன்றத்தில் தெரிவித்துள்ளார்.

இந்தியன் 2

-2

ஷங்கர் இயக்கத்தில் லைகா நிறுவனம் தயாரிப்பில் கமல் ஹாசன் நடித்து வந்த இந்தியன் 2 படப்பிடிப்பு ஓராண்டுக்கும் மேலாக நிறுத்தி வைக்கப்பட்டுள்ளது. கடந்த ஆண்டு பிப்ரவரி மாதம் செட்டில் கிரேன் விழுந்த விபத்தில் 3 பேர் பலியான பிறகு நிறுத்தி வைக்கப்பட்ட படப்பிடிப்பை இதுவரை துவங்கவில்லை. இந்நிலையில் ஷங்கர் அடுத்த படங்களில் கமிட்டாகிவிட்டார். இதை பார்த்த லைகா நிறுவனம் சென்னை உயர் நீதிமன்றத்தில் வழக்கு தொடர்ந்தது.

ஷங்கர்

அந்த வழக்கில் நேற்று ஷங்கர் தரப்பில் மனுத்தாக்கல் செய்யப்பட்டது. அதில் ஷங்கர் கூறியிருப்பதாவது, பல உண்மை தகவல்களை மறைத்துவிட்டு லைகா நிறுவனம் என் மீது வழக்கு தொடர்ந்திருக்கிறது. இந்தியன் 2 படத்தை தில் ராஜு தயாரிக்கிறேன் என்றார். ஆனால் லைகா நிறுவனம் அவரை சமாதானம் செய்து, தான் தயாரிக்க முன்வந்தது. 2017ம் ஆண்டு செப்டம்பர் மாதம் ப்ரீ ப்ரொடக்ஷன் பணிகளை செய்தேன். அதன் பிறகு 2018ம் ஆண்டு மே மாதம் படப்பிடிப்பை துவங்க முடிவு செய்தோம் என்றார்.

லைகா

அந்த மனுவில் ஷங்கர் மேலும் கூறியிருப்பதாவது, படத்தை எடுக்க ரூ. 270 கோடி செலவாகும் என்று பட்ஜெட்டை சொன்னபோது அதை குறைக்குமாறு லைகா நிறுவனம் தெரிவித்தது. அவர்கள் சொன்னதை கேட்டு பட்ஜெட்டை ரூ. 250 கோடியாக குறைத்தும் படப்பிடிப்பை திட்டமிட்டபடி துவங்கவிடாமல் லைகா நிறுவனம் தாமதம் செய்தது. தில் ராஜு இந்த படத்தை தயாரித்திருந்தால் ஏற்கனவே ரிலீஸ் செய்திருக்கலாம். செட் அமைத்துக் கொடுப்பதில் தாமதம், நிதி ஒதுக்குவதில் தாமதம் என்று லைகா செய்த காரியங்களால் தான் படப்பிடிப்பு தாமதமானது என்றார்.

கமல்

கமலுக்கு மேக்கப் அலர்ஜி ஏற்பட்டதால் படபப்பிடிப்பு தாமதமானது. அதற்கு நான் பொறுப்பல்ல. கிரேன் விபத்து, கொரோனா வைரஸ் பிரச்சனையாலும் படப்பிடிப்பு தாமதமானது. தயாரிப்பு பணிகளில் ஏற்பட்ட நஷ்டத்திற்கு நான் பொறுப்பு இல்லை. ஜூன் மாதத்தில் படப்பிடிப்பை துவங்க தயார் என்று நான் தெரிவித்தும் என் மீது வழக்கு தொடரப்பட்டுள்ளது. 2020ம் ஆண்டு ஜூன் முதல் 2021ம் மே மாதம் வரையான காலத்தை வீணடித்தது லைகா நிறுவனம் தான். எனவே, லைகா நிறுவனம் தொடர்ந்த இந்த வழக்கை தள்ளுபடி செய்யுமாறு கேட்டுக் கொள்கிறேன் என்றார் ஷங்கர். இந்த வழக்கை விசாரித்த நீதிபதி ஜெயச்சந்திரன் அதை ஜுன் மாதம் 4ம் தேதிக்கு ஒத்தி வைப்பதாக தெரிவித்தார்.