ஹைலைட்ஸ்:

  • கோப்ரா விக்ரம் புகைப்படத்தை வெளியிட்ட அஜய் ஞானமுத்து
  • ஆள் அடையாளமே தெரியாமல் இருக்கும் விக்ரம்
  • விக்ரம் புகைப்படத்தை பார்த்து அசந்து போன ரசிகர்கள்

இமைக்கா நொடிகள் படம் புகழ் அஜய் ஞானமுத்து இயக்கத்தில் விக்ரம் சுமார் 20 வித்தியாசமான லுக்குகளில் நடித்துள்ள படம் கோப்ரா. இப்படி ஆளே மாறிப் போய் நடிப்பது ஒன்றும் விக்ரமுக்கு புதிது அல்ல. இந்நிலையில் தான் படப்பிடிப்பு தளத்தில் விக்ரம் மேக்கப் போட்டபோது எடுக்கப்பட்ட புகைப்படத்தை அஜய் ஞானமுத்து சமூக வலைதளத்தில் வெளியிட்டுள்ளார்.

வெள்ளை மீசையும், கருப்புத் தாடியும் வைத்து அமர்ந்திருக்கும் நபர் விக்ரம் என்றே சொல்ல முடியாத அளவுக்கு வித்தியாசமாக இருக்கிறார். அந்த நபர் விக்ரம் என்று அஜய் ஞானமுத்து சொல்வதால் தான் நமக்கே தெரிகிறது.

அந்த புகைப்படத்தை வெளியிட்டு அஜய் ஞானமுத்து கூறியிருப்பதாவது, மீண்டும் பழையபடி நார்மலாகி வருகிறது. வேலைக்கு திரும்பிச் செல்ல காத்திருக்கிறேன் என்று தெரிவித்துள்ளார்.

கொரோனா வைரஸின் தாக்கம் குறைந்து வருவதால் மீண்டும் பணிக்கு திரும்பத் துடிக்கிறார் அஜய் ஞானமுத்து.

முன்னதாக கடந்த ஆண்டு மார்ச் மாதம் ரஷ்யாவில் கோப்ரா படப்பிடிப்பு நடந்தது. ஆனால் கொரோனா வைரஸ் பிரச்சனை தீவிரம் அடைந்ததால் படப்பிடிப்பை பாதியில் நிறுத்திவிட்டு ஊர் திரும்பினார்கள். சுமார் 9 மாதங்கள் காத்திருந்த பிறகு மீண்டும் படப்பிடிப்பை துவங்கினார்கள் என்பது குறிப்பிடத்தக்கது.

கோப்ரா படத்தில் கணிதவியலாளராக நடிக்கிறார் விக்ரம். படத்தின் டீஸர் கடந்த ஜனவரி மாதம் வெளியாகி ரசிகர்களை கவர்ந்தது. கோப்ரா படத்தில் முன்னாள் கிரிக்கெட் வீரர் இர்ஃபான் பதான், கே.ஜி.எஃப். படம் புகழ் ஸ்ரீநிதி ஷெட்டி, இயக்குநர் கே.எஸ். ரவிகுமார், மியா ஜார்ஜ் ஆகியோர் முக்கிய கதாபாத்திரங்களில் நடிக்கிறார்கள்.

விக்ரமை வித்தியாசமான கெட்டப்புகளில் பார்க்க ரசிகர்கள் ஆவலுடன் காத்திருக்கிறார்கள். மேலும் சொல்ல வரும் கதையை தேவையில்லாத பில்ட்அப் இல்லாமல் சொல்வதற்கு பெயர் போனவர் அஜய் ஞானமுத்து. அதனாலும் கோப்ரா மீது அதிக எதிர்பார்ப்பு உள்ளது.

எம்.ஜி.ஆர். கையில் இருக்கும் குழந்தை இப்போ ஒரு மாஸ் ஹீரோ: யார்னு தெரியுதா?