ஹைலைட்ஸ்:

  • இந்தியாவில் அதிகரித்து வரும் ஆக்ஸிஜன் சிலிண்டர் தேவை.
  • கொரோனா நிவாரணமாக மருத்துவ உபகரணம் வழங்கிய ‘ராதே ஷ்யாம்’ படக்குழுவினர்.
  • கொரோனா காரணமாக தள்ளிப்போன ‘ராதே ஷ்யாம்’ திரைப்பட ரிலீஸ் தேதி.

கொரோனா இரண்டாம் அலையை கட்டுப்படுத்த இயலாமல் மத்திய மாநில அரசுகள் தவித்து வருகின்றன. கொரோனா காரணமாக ஏற்படும் மரணங்களும் நாளுக்கு நாள் அதிகரித்து வருகிறது. தமிழகத்தில் மின்னல் வேகத்தில் பரவி வரும் கொரோனாவை கட்டுப்படுத்த பல்வேறு கட்டுப்பாடுகளை அறிவித்துள்ளது தமிழக அரசு. இந்நிலையில் பிரபல நடிகரின் திரைப்படத்திற்கு போடப்பட்ட செட் ஒன்றை, கொரோனா வார்டாக பயன்படுத்தி கொள்ள படக்குழுவினர் அனுமதி அளித்துள்ள நிகழ்வு ஆச்சரியத்தை ஏற்படுத்தியுள்ளது.

யுவி கிரியேஷன்ஸ் மற்றும் கோபி கிருஷ்ணா மூவிஸ் இணைந்து தயாரித்துள்ள படம் ‘ராதே ஷ்யாம்’. பிரபாஸ் ஹீரோவாக நடித்துள்ள இப்படத்தில், அவருக்கு ஜோடியாக பூஜா ஹெக்டே நடித்துள்ளார். ராதா கிருஷ்ணகுமார் இயக்கத்தில் பிரம்மாண்டமாக உருவாக்கி வருகிறது இந்த திரைப்படம். இந்தி, தெலுங்கு, தமிழ், மலையாளம், கன்னடம் ஆகிய மொழிகளில் வெளியாக இருந்த இந்த திரைப்படத்தின் ரிலீஸ் தேதி கொரோனா பரவல் காரணமாக தள்ளிவைக்கப்பட்டுள்ளது.

இந்த படத்தின் முக்கிய காட்சி ஒன்றுக்காக பிரம்மாண்டமாக மருத்துவமனை செட் போடப்பட்டது. 50 படுக்கைகள் கொண்ட கட்டில்கள், மெத்தைகள், ஆக்சிஜன் சிலிண்டர்கள், ஸ்ட்ரெச்சர்கள், வென்டிலேட்டர் ஆகியவை ஒரிஜினல் ஆகவே இந்த படத்தில் பயன்படுத்தப்பட்டது.

தேசிய விருது பெற்ற கதாசிரியரை வாரி சென்ற கொரோனா: கண்ணீரில் மலையாள திரையுலகம்!
இந்த நிலையில் படப்பிடிப்பு முடிந்ததும் செட்டை பிரிப்பதற்கான வேலைகளில் படக்குழு இறங்கிய போது, தனியார் மருத்துவமனை ஒன்றில் இருந்து கோரிக்கை ஒன்று வந்துள்ளது. அதாவது தங்கள் மருத்துவமனையில் கொரோனாவால் பாதிக்கப்பட்டவர்களுக்கு படுக்கை காலியாக இல்லை என்றும் அதனால் படத்திற்காக போடப்பட்ட செட்டில் உள்ள பொருள்களை தங்களுக்கு கொடுத்து உதவ வேண்டும் என்றும் கோரிக்கை விடுத்துள்ளனர்.

அவர்களின் இந்த கோரிக்கையை ஏற்றுக்கொண்ட ’ராதே ஷ்யாம்’ படக்குழுவினர் உடனடியாக படப்பிடிப்புக்காக போடப்பட்ட செட்டில் உள்ள பொருட்களை மருத்துவமனைக்கு நன்கொடையாக அளித்தனர். இதனை அடுத்து தற்போது அந்த மருத்துவமனையில் படக்குழுவினர் வழங்கிய பொருட்களை மருத்துவமனை நிர்வாகம் பயன்படுத்தி உள்ளதாக தகவல்கள் வெளியாகியுள்ளன. மேலும் ‘ராதே ஷ்யாம்’ படக்குழுவினர்களுக்கு பாராட்டுக்கள் குவிந்து வருகிறது.