ஒளிப்பதிவு சட்ட வரைவு 1952-ஐ மறுசீரமைக்கும் பணியை ஒன்றியஅரசு மேற்கொள்ளப் போகிறது. இந்தத் திருத்தச் சட்டப்படி ஒரு முறை தணிக்கைக்கு உள்ளான திரைப்படங்களை மீண்டும் தணிக்கை செய்ய கோர முடியும். இதனை எதிர்த்து சமூக ஆர்வலர்களும், சினிமா வல்லுனர்களும் குரல் கொடுத்து வருகின்றனர். இந்நிலையில் இந்த சட்டத்திற்கு எதிராக நடிகர் சூர்யா, இயக்குனர் கார்த்தி சுப்புராஜ் உள்ளிட்டோர் ட்விட் செய்து வருகின்றனர்.

இந்தியா முழுவதும் உள்ள சினிமா துறையை கட்டுப்படுத்தும் நோக்கில் மத்திய அரசு ஒளிப்பதிவு சட்ட வரைவு 1952ல் திருத்தம் கொண்டு வரும் முனைப்பில் ஈடுபட்டுள்ளது. இந்த ஒளிப்பதிவு சட்ட வரைவு 2021-ஐ பொதுமக்கள் கருத்திற்காக வெளியிட்டிருக்கிறது ஒன்றிய அரசு. இந்த சட்டம் குறித்து பொதுமக்கள் தங்கள் கருத்துகளை ஜூலை 2 தேதி வரை வெளியிடலாம் எனத் தெரிவித்துள்ளது.

இந்நிலையில் நடிகர் சூர்யா ஒளிப்பதிவு வரைவு மசோதாவுக்கு எதிர்ப்பு தெரிவித்துள்ளார். இது தொடர்பாக அவர் தனது ட்விட்டர் பக்கத்தில், ‘சட்டம் என்பது கருத்து சுதந்திரத்தைக் காப்பதற்காக, அதன் குரல்வளையை நெறிப்பதற்காக அல்ல. இன்றுதான் கடைசி நாள். உங்கள் ஆட்சேபணையைத் தெரிவியுங்கள்’ என்று பதிவிட்டு, இந்த மசோதா குறித்து பொதுமக்கள் கருத்து தெரிவிப்பதற்கான இணையதள பக்கத்தையும் பகிர்ந்துள்ளார்.

கொரோனா தடுப்பூசி முகாம் நடத்த போகும் நடிகர் சூர்யா: இணையத்தில் குவியும் பாராட்டுக்கள்!
அதே போல் இயக்குனர் கார்த்திக் சுப்புராஜும் தனது ட்விட்டர் பக்கத்தில் ஒளிப்பதிவு வரைவு மசோதாவுக்கு எதிராக டிவிட்டியுள்ளார். அதில், ஒளிப்பதிவு சட்டத்தில் முன்மொழியப்பட்டுள்ள திருத்தம், நடைமுறைப்படுத்தப்பட்டால், கலை பேச்சு சுதந்திரத்திற்கு பெரிய அடியாக இருக்கும். கருத்துச் சுதந்திரத்திற்காக நாங்கள் நிற்கிறோம் என்பதைக் காண்பிப்பதற்காக உங்கள் ஆட்சேபணையைத் தெரிவியுங்கள் என்று பதிவிட்டு, அதற்கான இணையத்தள பக்கத்தையும் பகிர்ந்துள்ளார்.

முன்னதாக இந்த வரைவு மசோதாவிற்கு எதிராக மக்கள் நீதி மய்யம் கட்சியின் தலைவரும் மூத்த நடிகருமான கமல்ஹாசன் தனது எதிர்ப்பை பதிவு செய்திருந்தார். இதுதொடர்பாக அவர் தனது ட்விட்டர் பக்கத்தில், ‘கண், வாய், காதுகளை அடைத்துக் கொண்டு இருக்கும் இந்தியாவின் மூன்று குரங்கு சின்னங்களாக ஒரு போதும் சினிமா, ஊடகம் மற்றும் கல்வி இருக்காது. அதன் சுதந்திரத்தை நசுக்கப் பார்த்தால் அது மிகப்பெரிய பாதிப்பையே உண்டாக்கும். இந்த சட்டத்திருத்தை எதிர்த்து அனைவரும் குரல் கொடுக்க வேண்டும்’ என்று பதிவிட்டிருந்தது குறிப்பிடத்தக்கது.