அமேசான் ப்ரைம் தளத்தில் வெளியாகியுள்ள ‘ஜெய் பீம்‘ படம் அனைத்து தரப்பினர் மத்தியிலும் வரவேற்பை பெற்று வருகிறது. அதே வேளையில் இந்தப்படத்தை சுற்றி வட்டமிடும் சர்ச்சைகளையும் ஓய்ந்தபாடாக இல்லை. தமிழ் சினிமாவில் பெரும் புகைச்சலை கிளப்பியுள்ள இந்த விவகாரம் தொடர்பாக பாமக எம்பி அன்புமணிக்கு தென்னிந்திய திரைப்பட வர்த்தக சபை கோரிக்கை ஒன்றை வெளியிட்டுள்ளது.

‘ஜெய் பீம்’ படம் தொடர்பாக அன்புமணி எழுப்பிய 9 கேள்விகளுக்கும் நடிகர் சூர்யா விளக்கமளித்திருந்தார். இந்நிலையில் நடிகர் சூர்யாவை தாக்கினாலோ, எட்டி உதைத்தாலோ அவருக்கு ஒரு லட்சம் ரூபாய் பரிசு வழங்கப்படும் என்று மயிலாடுதுறை பாமக மாவட்ட செயலாளர் பழனிசாமி நேற்றைய தினம் பேட்டியளித்தது பெரும் சர்ச்சைகளை கிளப்பியது. இந்த வேளையில் தென்னிந்திய நடிகர் சங்கம் சார்பில் பாமக எம்பி அன்புமணிக்கு கோரிக்கை ஒன்று விடுத்துள்ளனர்.

இதுதொடர்பாக அவர்கள் வெளியிட்டுள்ள கடிதத்தில், ஓடிடி தளத்தில் வெளியான ஜெய் பீம் திரைப்படத்தில் இருக்கும் ஒரு காட்சியை அகற்றும்படி நீங்கள் கோரிக்கை வைத்து இருந்தீர்கள். தங்கள் கட்சியின் முத்திரை அது என்று கூறி நீக்கும்படி கோரிக்கை வைத்தீர்கள். இதன் மீது உடனே நடவடிக்கை எடுக்கப்பட்டது.

அண்ணன் நமக்கு கற்பித்த பாதையில் பயணிப்போம்: சூர்யா ரசிகர்கள் அதிரடி முடிவு!
உங்களின் உணர்வுக்கு மதிப்பளித்து தென்னிந்திய திரைப்பட வர்த்தக சபையில் உறுப்பினராக இருக்கும் சூர்யா அந்த காட்சியை நீக்கினார். ஆனால் இந்த காட்சி வைக்கப்பட்டதற்கும், அந்த முத்திரை பயன்படுத்தப்பட்டதற்கு எந்த விதத்திலும் நடிகர் சூர்யாவிற்கு தொடர்பு இல்லை. அதேபோல் படத்தின் தயாரிப்பு நிறுவனத்திற்கும் எந்த தொடர்பும் இல்லை.

ஆனால் பாமக கட்சியினர் தொடர்ந்த இதை முன்னிட்டு சூர்யாவை விமர்சனம் செய்து வருகிறார்கள். இது எங்களுக்கு மிகுந்த வருத்தத்தை அளிக்கிறது. சூர்யா அரசியல், ஜாதி, இனம், மதம் போன்ற எந்த சார்பும் இன்றி செயல்படுபவர். எந்த சார்பும் இன்றி ஏழை மக்களுக்கு உதவ கூடியவர்.

தென்னிந்திய திரைப்பட வர்த்தக சபை

தென்னிந்திய திரைப்பட வர்த்தக சபை

பல விளிம்புநிலை மாணவர்களுக்கு கலங்கரை விளக்கமாக சூர்யா செயல்பட்டு வருகிறார். அவர்களின் வாழ்க்கையில் கல்வி ஒளி ஏற்றி வருகிறார். சமூக பணியாற்றி வரும் சூர்யாவை விமர்சிப்பதை நீங்கள் தவிர்க்க வேண்டும் என்று மிகவும் வருத்தத்துடன் கேட்டுக்கொள்கிறோம். இவ்வாறு தென்னிந்திய திரைப்பட வர்த்தக சபை பாமக எம்பி அன்புமணிக்கு கோரிக்கை விடுத்துள்ளது.

ரிலீஸ் முதல் சர்ச்சை வரை ”ஜெய் பீம்” ஆட்டம்!