தமிழ் சினிமா ரசிகர்கள் விரும்பும் வித்தியாசமான இயக்குனர்கள் பட்டியலில் தவறாமல் இடம்பெறுபவர் இயக்குனர் செல்வராகவன். இவர் முதன்முதலாக ‘சாணிக் காயிதம்‘ என்ற படத்தில் ஹீரோவாக நடித்து வருகிறார். அருண் மாதேஸ்வரன் இயக்கி வரும் இந்த படத்தின் படப்பிடிப்பு தற்போது நிறைவடைந்துள்ளதாக படக்குழுவினர் அறிவித்துள்ளனர்.

இயக்குனர் தியாகராஜன் குமாரராஜாவின் ஆரண்ய காண்டம் படத்தில் உதவி இயக்குநராகவும், இறுதிச்சுற்று படத்தின் வசன எழுத்தாளராகவும் பணியாற்றியவர் அருண் மாதேஸ்வரன். இவர் தற்போது செல்வராகவன், கீர்த்தி சுரேஷ் நடிப்பில் ‘சாணிக் காயிதம்’ என்ற படத்தை இயக்கி வருகிறார். கடந்த வருடம் இந்தப் படத்தின் பர்ஸ்ட் லுக் போஸ்டர் வெளியாகி இருந்தாலும் இந்த வருடம் பிப்ரவரி மாதம் தான் படப்பிடிப்பு துவங்கியது.

கொரோனா நெருக்கடியால் தடைபட்ட இந்தப் படப்பிடிப்பு அண்மையில் மீண்டும் துவங்கி தற்போது நிறைவடைந்துள்ளது. படத்தின் கடைசி நாள் படப்பிடிப்பில் கீர்த்தி சுரேஷ், செல்வராகவன் உள்ளிட்டோர் கலந்துகொண்ட புகைப்படங்கள் சமூக வலைதளங்களில் வெளியாகி வைரலாகி வருகின்றன.

பிரபல தயாரிப்பு நிறுவனத்திற்கு ரூ.5 லட்சம் அபராதம்: விஷாலுக்கு எதிரான வழக்கில் அதிரடி தீர்ப்பு!
அருண் மாதேஸ்வரன் இயக்கத்தில் ஏற்கனவே ‘ராக்கி’ என்ற படம் தயாராகி வெளியீட்டுக்கு காத்து கொண்டிருக்கிறது. நடிகை நயன்தாரா மற்றும் இயக்குநர் விக்னேஷ் சிவனின் ரௌடி பிக்சர்ஸ் நிறுவனம் ராக்கி படத்தை தயாரித்துள்ளது. இன்னும் வெளியாக இந்தப் படத்தின் ட்ரெய்லர் ரசிகர்களிடையே பெரும் பாராட்டைப் பெற்றுள்ளது. வசந்த் ரவி, பாரதிராஜா போன்ற நடிகர்கள் ராக்கி படத்தில் நடித்துள்ளனர்.

செல்வராகவன் நெல்சன் திலீப்குமார் இயக்கத்தில் விஜய் நடித்து வரும் பீஸ்ட் படத்தில் இணைந்துள்ளதாக அண்மையில் அதிகாரப்பூர்வ அறிவிப்பு வெளியானது. இந்த படத்தில் செல்வராகவன் வில்லனாக நடிக்க உள்ளதாக தகவல்கள் வெளியாகியுள்ளன. இது மட்டுமல்லாமல் தனுஷ் நடிப்பில் நானே வருவேன், ஆயிரத்தில் ஒருவன் 2 உள்ளிட்ட படங்களையும் இயக்க உள்ளார் செல்வராகவன்.