பாலிவுட் சினிமாவில் நடிகர், இயக்குநர், தயாரிப்பாளர் என பல தளங்களில் பயணித்துவருபவர் நடிகர் அமீர்கான். அமீர் தனது முதல்மனைவியான ரீனா தத்தாவை கடந்த 2002 ஆம் ஆண்டு விவாகரத்து செய்தார். இந்நிலையில் இவரும், இவர் இரண்டாவது மனைவி கிரண் ராவ் இருவரும் தங்களது 15 வருட திருமண வாழ்க்கையை முடித்துக்கொள்வதாக அறிவித்துள்ளனர்.

அமீர்கான் லகான் திரைப்படத்தில் நடித்த போது அந்தப்படத்தில் உதவி இயக்குநராக பணியாற்றிய கிரண் ராவுடன் பழக்கம் ஏற்பட்டது. இதனையடுத்து இருவரும் 2005-ல் திருமணம் செய்து கொண்டனர். இவர்களுக்கு ஆசாத் என்ற மகன் உள்ளார். இந்நிலையில் இந்த தம்பதியினர் இருவரும் தங்களது விவாகரத்தை அறிவித்துள்ளனர். இதுதொடர்பாக இருவரும் இணைந்து கூட்டாக அறிக்கை ஒன்றையும் வெளியிட்டுள்ளனர்.

அதில், “இந்த 15 ஆண்டுகால அழகான வாழ்க்கை அனுபவங்களையும், மகிழ்ச்சியையும், சிரிப்பையும் பகிர்ந்து கொண்டிருக்கிறோம். எங்களுடைய உறவு நம்பிக்கையாலும், மதிப்பினாலும், காதலினாலும் வளர்ந்திருக்கிறது. இப்போது நாங்கள் எங்கள் வாழ்க்கையில் ஒரு புதிய அத்தியாயத்தைத் தொடங்க விரும்புகிறோம்.

குழந்தைகளுக்காக பிரத்யேக கொரோனா வார்டு அமைக்க திட்டமிடும் வலிமை பட நாயகி!
இனி நாங்கள் கணவன் மனைவியாக நீடிக்கப் போவதில்லை. ஆனால், சக பெற்றோராக, குடும்பமாக இணைந்திருப்போம். சில நாட்களுக்கு முன்பே நாங்கள் பிரிவதற்கு திட்டமிட்டு இருந்தோம். தற்போது அதை முறைப்படுத்துவதற்கான சூழல் அமைந்தது. எங்கள் மகன் ஆசாத்துக்கு ஓர் அர்ப்பணிப்பான பெற்றோராக நாங்கள் நீடித்திருப்போம். அவனை நாங்கள் இருவரும் சேர்ந்தே பராமரித்து வளர்ப்போம். திரைப்படங்களிலும், பாணி அறக்கட்டளை உள்ளிட்ட வேலை தொடர்பான விஷயங்களில் தொடர்ந்து நாங்கள் பணியாற்றுவோம்.

எங்கள் குடும்பத்தினர், நண்பர்கள் ஆகியோரது தொடர் ஆதரவுக்கும், இந்த உறவின் பரிணாமம் குறித்த அவர்களது புரிதலுக்கும் மிகப்பெரிய நன்றியைத் தெரிவித்துக் கொள்கிறோம். அவர்கள் இல்லாமல் எங்கள் இந்த முடிவைப் பாதுகாப்பு உணர்வுடன் எடுத்திருக்க இயலாது. எங்கள் நலம் விரும்பிகளிடம் வாழ்த்துகளையும், ஆசீர்வாதங்களையும் வேண்டுகிறோம். எங்களைப் போலவே நீங்கள் விவாகரத்து என்பதை ஒரு முடிவாகப் பார்க்காமல் ஒரு புதிய பயணத்துக்கான தொடக்கமாகப் பார்ப்பீர்கள் என்று நம்புகிறோம்”. இவ்வாறு அந்த அறிக்கையில் குறிப்பிட்டுள்ளனர்.