பிரபல நாடக மற்றும் திரைப்பட நடிகர், வசனகர்த்தா கிரேஸி மோகன் அவர்கள் மறைந்து இன்றுடன் இரண்டு ஆண்டுகள் நிறைவடைந்துள்ளது. நகைச்சுவை உலகில் வசனங்கள் வாயிலாக அனைவரையும் சிரிக்க வைத்தவர் கிரேஸி மோகன். அவருடைய இந்த இரண்டாம் ஆண்டு நினைவு நாளில், அவருடைய உற்ற நண்பரான கமல்ஹாசன் அவருடனான மலரும் நினைவுகள் குறித்து தன்னுடைய ட்விட்டர் பக்கத்தில் பதிவு ஒன்றை பகிர்ந்துள்ளார்.

1952ம் ஆண்டு அக்டோபர் 16ம் தேதி பிறந்த மோகன் ரங்காச்சாரி சினிமா உலகில் கிரேஸி மோகனாக பிரபலமானார். சினிமா உலகை தாண்டி நாடக உலகில் தனது இறுதிக்காலம் வரை தன்னை ஈடுபடுத்திக் கொண்டு வந்தவர் கிரேஸி மோகன். கடந்த 2019ம் ஆண்டு ஜூன் மாதம் 10ம் தேதி காலமான போது, ஒட்டுமொத்த திரையுலகமும் சோகத்தில் ஆழ்ந்தது.

கலைமாமணி விருது பெற்ற கிரேஸி மோகன் உலக நாயகன் கமல்ஹாசனின் நெருங்கிய நண்பர். அபூர்வ சகோதரர்கள், மைக்கேல் மதன காமராஜன், இந்திரன் சந்திரன், மகளிர் மட்டும், சதி லீலாவதி, அவ்வை சண்முகி, காதலா காதலா, தெனாலி, பஞ்சதந்திரம், பம்மக் கே சம்மந்தம், வசூல் ராஜா எம்பிபிஎஸ் மற்றும் மன்மதன் அம்பு படம் உட்பட பல திரைப்படங்களில் நடிகர் கமல்ஹாசனுடன் இணைந்து பணியாற்றியுள்ளார் கிரேஸி மோகன்.

மீண்டும் இணையும் அட்லீ – ஜெய் கூட்டணி: வில்லன் அவதாரம் எடுக்கும் ஜெய்!
இந்நிலையில் கிரேஸி மோகனின் இரண்டாம் ஆண்டு நினைவு நாளில் அவரை நினைவு குறித்து தன்னுடைய ட்விட்டர் பக்கத்தில் பதிவு ஒன்றை பகிர்ந்துள்ளார் கமல்ஹாசன். அதில், ‘நாடகமே உலகம் என்கிற ஞானச்சொல்லை, நகைச்சுவை நாடகமே உலகம் என்று மாற்றியவர். சிரிப்பு முகமூடிக்குள் தீவிர மரபிலக்கிய முகத்தோடு வானம் போல் வாழ்ந்து மறைந்தவர் கிரேஸி மோகன். இரண்டாம் நினைவு நாளில் அவரை நினைவு கூர்கிறேன்’ என கிரேஸி மோகன் குறித்து உருக்கமாக குறிப்பிட்டுள்ளார் கமல்ஹாசன்.

இதே போல், கமல்ஹாசனும் கிரேஸி மோகனும் இணைந்து பணியாற்றிய படங்களின் புகைப்படங்களுடன் கிரேஸியின் புகைப்படத்தை எடிட் செய்து ராஜ்கமல் தயாரிப்பு நிறுவனத்தின் அதிகார ட்விட்டர் பக்கத்தில் பதிவிட்டுள்ளனர். அத்துடன், கிரேஸியின் எழுத்துகளுக்கு முதல் ரசிகராக கமல்ஹாசன் இருந்தார் என்றும் அந்த பதிவில் குறிப்பிட்டுள்ளனர்.