பாலிவுட் சினிமாவின் பழம்பெரும் நடிகரான திலீப் குமார், மூச்சுத்திணறல் காரணமாக கடந்த மாதம் மும்பையின் கர் பகுதியில் இருக்கும் ஹிந்துஜா மருத்துவமனையில் அனுமதிக்கப்பட்டார். அங்கு அவருக்கு மருத்துவர்களின் தீவிர கண்காணிப்பில் சிகிச்சை அளிக்கப்பட்டு வந்தது. நேற்றைய தினம் அவரது உடல்நிலை தேறி வருவதாக அவர் மனைவி சாய்ரா பானு தெரிவித்திருந்தார். இந்நிலையில் இன்று காலை சிகிச்சை பலனின்றி காலமானார் திலீப் குமார்.

யூசுப் கான் என்ற இயற்பெயரைக் கொண்ட திலீப் குமார் பாலிவுட்டின் 1950 களில் பாலிவுட் சினிமாவின் உச்சநட்சத்திரமாக திகழ்ந்தார். அவரது நடிப்பில் வெளியான தேவ்தாஸ், மொகல்-இ-அஸாம், கங்கா ஜமுனா உள்ளிட்ட படங்கள் இன்றும் பாலிவுட் ரசிகர்களால் கொண்டாடப்பட்டு வருகிறது. 65க்கும் மேற்பட்ட படங்களில் நடித்துள்ள திலீப் குமார் இறுதியாக 1998ஆம் ஆண்டு வெளியான ‘கிலா’ என்ற படத்தில் நடித்திருந்தார்.

இந்நிலையில் நடிகர் திலீப் குமாரின் மறைவிற்கு திரையுலக பிரபலங்கள். அரசியல் கட்சி தலைவர்கள் பலரும் இரங்கல் தெரிவித்து வருகின்றனர். நடிகர் கமல்ஹாசன் தனது ட்விட்டர் பக்கத்தில் திலீப் குமார் மறைவிற்கு இரங்கல் தெரிவித்துள்ளார்.

இந்தித் திரையுலகின் சிவாஜி கணேசன்: பாலிவுட் நடிகர் திலீப் குமார் மறைவிற்கு வைகோ இரங்கல்!
அதில், “இந்திய சினிமாவின் இணையற்ற நடிகர் திலீப் குமார் மறைந்தார். இந்தியா- பாகிஸ்தான் மக்களுக்கு இடையே நல்லிணக்கத்தை உருவாக்கும் உறவுப் பாலமாகத் திகழ்ந்தவர். ஏழைகளின் மீது கரிசனம் மிக்கவர். நிறைவாழ்வு வாழ்ந்த கதாநாயகருக்குப் புகழஞ்சலி” என்று தெரிவித்துள்ளார்.

மேலும், தன்னுடைய மற்றொரு ட்விட்டில், “நடிப்பில் ஒரு தரத்தையும், அர்ப்பணிப்பையும் பேண வேண்டும் என்று என்னைப் போல பல நடிகர்களுக்குச் சொல்லிக் கொடுக்கும் வாழ்க்கை திலீப் குமாருடையது. உண்மையில் இந்தியாவின் மிக உயர்ந்த நடிகர்களில் ஒருவர் நம்மை விட்டுப் பிரிந்துவிட்டார். ஆனால், அவரது அற்புதமான நடிப்பு என்கிற பொக்கிஷத்தை நமக்காக விட்டுச் சென்றுள்ளார். நடிப்பில் அவரது புரிதல் அணுகுமுறையை இன்னும் சமகால நடிகர்கள் சிலர் தைரியமாக முயற்சி செய்யத் துணிகின்றனர்” என்று குறிப்பிட்டுள்ளார் கமல்ஹாசன்.