ஹைலைட்ஸ்:

  • கொரோனா நிவாரண நிதிக்கு ரூ. 50 லட்சம் கொடுத்த ரஜினி
  • முதல்வர் ஸ்டாலினை சந்தித்து நிதி வழங்கிய ரஜினி
  • கொரோனா தடுப்பூசி போட்டுக் கொண்ட ரஜினி

கொரோனாவின் இரண்டாம் அலையால் இந்திய மக்கள் பலரும் அவதிப்பட்டுக் கொண்டிருக்கிறார்கள். மருத்துவமனைகளில் பெட் இல்லை, ஆக்சிஜன் சிலிண்டர் இல்லை, ரெம்டெசிவிர் மருந்து கிடைப்பது இல்லை என்று மக்கள் அழுது புலம்புவதை தினமும் பார்க்க முடிகிறது.

கொரோனா தடுப்பு பணிகளுக்காக தாராளமாக நிதி அளிக்குமாறு முதல்வர் ஸ்டாலின் கேட்டுக் கொண்டார். இதையடுத்து தமிழகத்தை சேர்ந்த தொழில் அதிபர்கள், திரையுலக பிரபலங்கள் ஸ்டாலினை சந்தித்து கொரோனா நிவாரண நிதி வழங்கி வருகிறார்கள். சூர்யா, கார்த்தி, சிவகுமார் ஆகியோர் ரூ. 1 கோடி அளித்தனர். இதையடுத்து ரஜினியின் இளைய மகள் சவுந்தர்யா குடும்பத்தாரும் ரூ. 1 கோடி நிதி அளித்தார்கள்.

கொரோனா நிவராண நிதிக்கு எந்தெந்த நடிகர்கள் எவ்வளவு கொடுத்தார்கள்?: விபரம் இதோ

அஜித், சிவகார்த்திகேயன், இயக்குநர் ஏ.ஆர். முருகதாஸ் ஆகியோர் தலா ரூ. 25 லட்சம் கொடுத்தார்கள். இயக்குநர் ஷங்கர், ஜெயம் ரவி, வெற்றிமாறன் ஆகியோர் தலா ரூ. 10 லட்சம் கொடுத்தார். இந்நிலையில் ரஜினிகாந்த் இன்று தலைமைச் செயலகத்திற்கு சென்று ஸ்டாலினை சந்தித்து ரூ. 50 லட்சம் நிதி அளித்துள்ளார்.

ஸ்டாலின் முதல்வராக பொறுப்பேற்ற பிறகு நடந்திருக்கும் முதல் சந்திப்பு இது. அவர் முதல்வராக பதவியேற்றபோது ஹைதராபாத்தில் அண்ணாத்த படப்பிடிப்பில் இருந்தார் ரஜினி.

நிதி வழங்கிய பிறகு செய்தியாளர்களை சந்தித்த ரஜினி கூறியதாவது,

கொரோனா வைரஸ் பரவலை தடுக்க அரசு எடுக்கும் நடவடிக்கைகளுக்கு பொதுமக்கள் ஒத்துழைப்பு அளிக்க வேண்டும். வெளியே வரும்போது கட்டாயம் மாஸ்க் அணிய வேண்டும் என்றார்.

முன்னதாக ஹைதராபாத்தில் இருந்து சென்னை திரும்பிய மறுநாளே கொரோனா தடுப்பூசி போட்டுக் கொண்டார் ரஜினி. தடுப்பூசி போடுவதில் மக்களிடையே தயக்கம் இருக்கும் நேரத்தில் ரஜினி செய்த காரியம் பலருக்கும் தைரியத்தை அளித்துள்ளது.