ஹைலைட்ஸ்:

  • முதல்வர் ஸ்டாலினுக்கு ராகவா லாரன்ஸ் நன்றி
  • சாலை பாதுகாப்பு பணியில் பெண் போலீசாரை ஈடுபடுத்த வேண்டாம்- ஸ்டாலின்
  • ஸ்டாலினுக்கு குவியும் பாராட்டு

பிரதமர், முதல்வர், அமைச்சர்கள் உள்ளிட்டோர் செல்லும் வழியில் சாலை பாதுகாப்பு பணியில் பெண் போலீசார் ஈடுபடுத்தப்பட்டு வந்தார்கள். பிரமுகர்கள் அந்த வழியாக செல்லும் வரை மணிக்கணக்கில் அவர்கள் சாலையில் நிற்க வேண்டும். அந்த நேரம் இயற்கை உபாதைகளை கழிக்க வசதி கூட இல்லாமல் அவதிப்பட்டார்கள். தாகத்திற்கு தண்ணீர் கூட கிடைக்காமல் இருந்ததும் உண்டு.

அப்படி பெண் போலீசார் படும் கஷ்டங்கள் குறித்து அண்மையில் கூட சமூக வலைதளத்தில் விவாதம் நடந்தது. இந்நிலையில் சாலை பாதுகாப்பு பணியில் பெண் போலீசாரை ஈடுபடுத்த வேண்டாம் என்று முதல்வர் மு.க. ஸ்டாலின் உத்தரவிட்டுள்ளார்.

இதையடுத்து இது தொடர்பாக டிஜிபி திரிபாதி வாய்மொழி உத்தரவு பிறப்பித்துள்ளார். முதல்வரின் உத்தரவால் பெண் போலீசார் நிம்மதி அடைந்துள்ளனர்.

ஸ்டாலினின் இந்த செயலுக்கு திரையுலகை சேர்ந்த பலரும் வாழ்த்து தெரிவிப்பதுடன், நன்றியும் கூறி வருகிறார்கள்.

இந்நிலையில் நடிகரும், இயக்குநரும், டான்ஸ் மாஸ்டருமான ராகவா லாரன்ஸும் ஸ்டாலினிக்கு நன்றி தெரிவித்து ட்வீட் செய்திருக்கிறார். அந்த ட்வீட்டில் அவர் கூறியிருப்பதாவது,
சாலையில் பாதுகாப்பு பணிகளில் இருந்து பெண் போலீசாருக்கு விலக்கு அளிக்கப்பட்ட செய்தியை அறிந்தேன். பலமுறை நான் என் தாயுடன் பயணம் செய்யும்போது இவ்வாறு பாதுகாப்பு பணியில் இருக்கும் பெண்கள் இயற்கை உபாதைக்காக, அவசரத் தேவைகளுக்காகவும் என்ன செய்வார்கள் என்பது பற்றி என் அம்மா என்னிடம் சொல்லி வருத்தப்பட்டு இருக்கிறார், நானும் வருந்திருக்கிறேன்.

அந்த வகையில் இந்த ஆணையை கண்டு மன நிம்மதி அடைகிறேன். முதல்வர் மு.க. ஸ்டாலின் அவர்களுக்கு நன்றி என்று தெரிவித்துள்ளார்.

நயன்தாராவுக்கு என்னால் தான் வாழ்க்கை கிடைச்சிருக்கு: சுசித்ராவின் மாஜி கணவர்