தான் கொரோனாவால் பாதிக்கப்பட்டிருந்தபோது கவலையில் எழுதிய இமெயில் குறித்து தெரிவித்துள்ளார் நடிகை பாருல் யாதவ்.

பாருல் யாதவ்

தனுஷின் ட்ரீம்ஸ் படம் மூலம் கோலிவுட் வந்த நடிகை பாருல் யாதவுக்கு கொரோனா வைரஸ் பாதிப்பு ஏற்பட்டு மீண்டு வந்திருக்கிறார். இந்நிலையில் கொரோனா பாதிப்பால் தான் பட்ட கஷ்டங்களை எல்லாம் தெரிவித்துள்ளார். இது குறித்து பாருல் யாதவ் கூறியதாவது, முதல் லாக்டவுனின்போது பெரிதாக எதுவும் தெரியவில்லை. இரண்டாம் அலையில் எனக்கு நெருக்கமானவர்கள் கொரோனாவால் இறக்கத் துவங்கியதும் தான் மன அழுத்தம் ஏற்பட்டது. மேலும் எனக்கும் கொரோனா பாதிப்பு ஏற்பட்டது என்றார்.

கொரோனா

பாருல் மேலும் கூறியதாவது, ஏப்ரல் மாதம் 22ம் தேதி எனக்கு கொரோனா வைரஸ் பாதிப்பு ஏற்பட்டது. என் வீட்டில் வேலை செய்யும் பெண் மற்றும் என் குடும்பத்தார் என மொத்தம் 7 பேர் கொரோனாவால் பாதிக்கப்பட்டோம். இரண்டு முறை புற்றுநோயில் இருந்து மீண்ட என் அம்மா வேறு வீட்டில் இருந்தார். நல்ல வேளையாக நான் மூன்றாவது மாடியில் தனியாக வசித்தேன். அதனால் அம்மா எனக்கு சமைத்து கொடுத்தார். யாராவது என் வீட்டு வாசலில் உணவை வைத்துவிட்டு செல்வார்கள்.

காய்ச்சல்

சுவை தெரியவில்லை, மணம் தெரியவில்லை. தொடர்ந்து 12 நாட்களுக்கு 103 டிகிரி காய்ச்சல் இருந்தது. என் டாக்டருக்கு போன் செய்து இதில் இருந்து நான் மீண்டு வர மாட்டேன் என்றேன். நான் இறந்துவிட்டால் என் சொத்துக்களை என் இரண்டு சகோதரிகளுக்கும் சரிசமமாக பிரித்துக் கொடுக்க வேண்டும் என்று இமெயில் எழுதினேன். அந்த இமெயிலை பார்த்து என் சகோதரிகள் அழுதார்கள். இப்படி எல்லாம் எழுதாதே, உனக்கு ஒன்றும் ஆகாது என்றார்கள்.

நலம்

தற்போது நான் நலமாக இருக்கிறேன். ஆனால் கொரோனாவால் பாதிக்கப்பட்டபோது ஒரு நாள் இரவு 2.30 மணிக்கு காய்ச்சல் அதிகமானது. உடனே மாத்திரை சாப்பிட்டேன். அதன் பிறகு 103 டிகிரிக்கு மேல் சென்றுவிட்டது. கைகள் நடுங்குகிறது. டாக்டருக்கு போன் செய்து என்னால் முடியவில்லை என்றேன். நம்பிக்கையை இழந்தால் ரொம்ப கஷ்டம் என்றார் அவர். உடனே ஒரு துண்டை எடுத்து ஐஸ் பக்கெட்டில் முக்கி நெற்றியில் வைத்தேன். அன்று இரவு நான் இறக்கவில்லை. அதில் இருந்தே என்னை எதனாலும் கொல்ல முடியாது என்பதை புரிந்து கொண்டேன் என்றார் பாருல் யாதவ்.