விஷால் நடிப்பில் வெளியான சண்டக்கோழி 2 படத்தைத் தொடர்ந்து தெலுங்கில் ராம் பொத்னியேனி நடிக்கும் படத்தை இயக்குகிறார் லிங்குசாமி. இந்த படத்தில் ராம் போலீஸ் அதிகாரியாக நடிப்பதாக கூறப்படுகிறது. இந்தப் படத்தில் மாதவன் வில்லனாக நடிப்பதாக கடந்த சில நாட்களாக செய்திகள் வெளியாகின. இந்நிலையில் லிங்குசாமி படத்தில் தான் நடிக்கவில்லை என விளக்கம் அளித்துள்ளார் நடிகர் மாதவன்.

தெலுங்கில் முன்னணி நாயகனாக திகழும் ராம் பொத்தினேனி நடிக்கவுள்ள அடுத்த படத்தை இயக்கவுள்ளார் லிங்குசாமி. இதன் நாயகியாக அண்மையில் வெளியான ‘உப்பெனா’ படத்தில் நடித்து, அனைவரது கவனத்தையும் ஈர்த்த கீர்த்தி ஷெட்டி நடிக்கவுள்ளார். தேவி ஸ்ரீ பிரசாத் இசையமைக்கவுள்ள இந்தப் படத்தை ஸ்ரீனிவாசா சில்வர் ஸ்கிரீன் நிறுவனம் தயாரிக்கவுள்ளது.

கொரோனா அச்சுறுத்தல் குறைந்த பின்னர் இந்த படத்தை துவங்கலாம் என காத்திருக்கின்றனர் படக்குழுவினர். இந்தப் படத்தில் ராம் பொத்தினேனிக்கு வில்லனாக நடிக்கப் பல்வேறு முன்னணி நடிகர்களிடம் பேச்சுவார்த்தை நடத்தி வருகிறது படக்குழு. சமீபத்தில் அருண் விஜய்யிடம் பேச்சுவார்த்தை நடப்பதாக செய்திகள் வெளியாகின. இதனிடையில் நடிகர் மாதவன் இந்தப் படத்தில் வில்லனாக நடிக்க உள்ளதாக தகவல்கள் வெளியாகின.

சர்ச்சைகளை கிளப்பும் பேமிலி மேன் 2 சீரிஸ்: வேண்டுகோள் வைத்த இயக்குனர் சேரன்!
கடந்த சில நாட்களாக சமூக வலைத்தளங்களில் தீயாக பரவிய இந்த செய்தி குறித்து நடிகர் மாதவன் தனது ட்விட்டர் பக்கத்தில் பதிவு ஒன்றை பகிர்ந்துள்ளார். அதில், ‘இயக்குநர் லிங்குசாமியுடன் மீண்டும் பணியாற்ற ஆர்வமாக இருக்கிறேன். அவரும் மிக இனிமையான மனிதர். துரதிர்ஷ்டவசமாக அவர் இயக்கும் தெலுங்கு திரைப்படத்தில் நான் வில்லனாக நடிப்பதாக வந்திருக்கும் செய்தியில் எந்த உண்மையும் இல்லை’ என குறிப்பிட்டுள்ளார்.

ஏற்கனவே லிங்குசாமி இயக்கத்தில் ரன், வேட்டை ஆகிய இரண்டு படங்களில் நடித்துள்ளார் மாதவன். லிங்குசாமி முதலில் அல்லு அர்ஜுனை இயக்குவதாக தான் இருந்தது. ஆனால், சில காரணங்களால் அவர் கால்ஷீட் கிடைக்காததால், ராம் பொத்தினேனியை வைத்து படம் எடுக்கிறார் லிங்குசாமி. தமிழ், தெலுங்கு இருமொழிகளில் இந்தப் படம் தயாராகிறது என்பது குறிப்பிடத்தக்கது.