கொரோனா தடுப்பு பணிகளுக்காக முதல்வரிடம் ரூ. 1 கோடி நிதி வழங்கிய சிவகுமார், சூர்யா, கார்த்தி ஆகியோரை பலரும் வாழ்த்தியுள்ளனர்.

கொரோனா

கொரோனாவின் இரண்டாம் அலையால் இந்திய மக்கள் பெரும் அவதிக்குள்ளாகியுள்ளனர். கொரோனாவால் பாதிக்கப்பட்டுள்ளவர்கள் மருத்துவமனைகளில் பெட் கிடைக்காமல், ஆக்சிஜன் சிலிண்டர் கிடைக்காமல், ரெம்டெசிவிர் மருந்து கிடைக்காமல் கஷ்டப்படுகிறார்கள். இந்தியாவில் கொரோனாவால் இறப்பவர்கள் சரியான சிகிச்சை இல்லாமல் தான் இறக்கிறார்கள் என்று சமூக வலைதளங்களில் பேசிக் கொள்கிறார்கள். எனக்கு நல்ல சிகிச்சை கொடுத்திருந்தால் காப்பாற்றியிருக்க முடியும் என்று இறப்பதற்கு முன்பு நடிகர் ராகுல் வோரா தன் ஃபேஸ்புக் பக்கத்தில் தெரிவித்திருந்தார்.

நிவாரண நிதி

நிலைமை மோசமாக இருக்கும் இந்த நேரத்தில் முதல்வர், பிரதமரிடம் பிரபலங்கள் நிவாரண நிதி அளித்து வருகிறார்கள். இந்நிலையில் நடிகர் சிவகுமார் தன் மகன்கள் சூர்யா, கார்த்தி ஆகியோருடன் சென்று முதல்வர் மு.க. ஸ்டாலினை சந்தித்து கொரோனா தடுப்பு பணிகளுக்காக ரூ. 1 கோடி நிதி அளித்தார். அவர்கள் நிதி வழங்கியபோது எடுக்கப்பட்ட புகைப்படங்கள் சமூக வலைதளங்களில் வெளியாகின. அதை பார்த்த ரசிகர்கள் சூர்யா குடும்பத்தாரை வாழ்த்தியுள்ளனர்.

ஸ்டாலின்

கொரோனா தடுப்பு பணிகளுக்காக தாராளமாக நிதி அளிக்குமாறு ஸ்டாலின் நேற்று முன்தினம் அறிக்கை வெளியிட்டார். அவர் அறிக்கை வெளியிட்ட மறுநாளே சிவகுமார் குடும்பத்தார் ரூ. 1 கோடி நிதி அளித்துள்ளனர். அந்த அறிக்கையில் ஸ்டாலின் கூறியிருந்ததாவது, இந்த நோய்த் தொற்றால் பாதிக்கப்பட்டுள்ள மாநிலத்தின் பொருளாதாரம் மீண்டெழுவதற்கு சிரமப்பட்டுவரும் நிலையில் இந்தப் பேரிடரை எதிர்கொள்வதற்கு நமது அரசு கூடுதலான நிதி ஆதாரங்களைச் செலவிட வேண்டிய தேவையும் உள்ளது. எனவே, அரசின் முனைப்பான முயற்சிகளுக்கு நமது சமுதாயத்தின் ஒவ்வொரு பிரிவினரும் தங்களால் இயன்ற வகையில் உதவி செய்ய வேண்டியது அவசியம். இச்சூழலில் முதலமைச்சரின் பொது நிவாரண நிதிக்கு தாராளமாக நன்கொடை வழங்கிட வேண்டுமென்று உங்கள் அனைவருக்கும் தனிப்பட்ட முறையில் வேண்டுகோள் விடுக்கின்றேன் என்றார்.

நிதி

மக்கள் அளிக்கும் நிதி குறித்து ஸ்டாலின் தன் அறிக்கையில் குறிப்பிட்டிருந்ததாவது, இப்பேரிடர் காலத்தில் தாங்கள் ஒவ்வொருவரும் அளிக்கக்கூடிய நன்கொடைகள் அனைத்தும், ஆக்சிஜன் உற்பத்தி மற்றும் சேமிப்பு நிலையங்கள் அமைத்தல், ஆக்சிஜன் வசதிகளுடன்கூடிய படுக்கைகளை அமைத்தல், ஆக்சிஜன் செரிவூட்டும் இயந்திரங்கள், ஆர்.டி.பி.சி.ஆர். கிட்டுகள், உயிர்காக்கும் மருந்துகள், தடுப்பூசிகள் மற்றும் பிற மருத்துவக் கருவிகளை வாங்குதல் போன்ற கொரோனா நிவாரண நடவடிக்கைகளுக்கு மட்டுமே முழுமையாகப் பயன்படுத்தப்படும் என நான் உறுதி அளிக்கிறேன். மேற்கூறிய நடவடிக்கைகளுக்காக பெறப்பட்ட நன்கொடை விவரங்கள் மற்றும் இந்த நிதியிலிருந்து மேற்கொள்ளப்பட்ட செலவினங்கள் குறித்த விவரங்கள் அனைத்தும் வெளிப்படையாக பொதுவெளியில் வெளியிடப்படும் என்பதையும் தெரிவித்துக் கொள்கின்றேன். இவ்வாறு அளிக்கப்படும் நன்கொடைகளுக்கு வருமான வரிச் சட்டம் பிரிவு 80(ழு)-ன்கீழ் 100 விழுக்காடு வரிவிலக்கு உண்டு. வெளிநாடு வாழ் இந்தியர்கள் அல்லது வெளிநாட்டு மக்களிடமிருந்து பெறப்படும் நிவாரணத்திற்கு அயல் நாட்டு பங்களிப்பு (ஓழுங்காற்று) சட்டம் 2010, பிரிவு 50-ன்கீழ் விலக்களிக்கப்படும் என்றார்.