விஷால் நடிப்பில் கடந்த பிப்ரவரி 19 ஆம் தேதி வெளியான படம் ‘சக்ரா’. இப்படம் வெளியீட்டின் போது டிரைடெண்ட் ஆர்ட்ஸ் மற்றும் லைகா புரொடக்‌ஷன் நிறுவனங்கள் படத்தின் வெளியீட்டுக்கு தடை விதிக்க கோரி வழக்கு தொடர்ந்தன. இந்த வழக்கின் தீர்ப்பு கடந்த சில தினங்களுக்கு முன்பாக வெளியானது.

சக்ரா படத்தினை வெளியிட இடைக்கால தடை விதிக்க வேண்டும் என்று டிரைடெண்ட் ஆர்ட்ஸ் மற்றும் லைகா புரொடக்‌ஷன் நிறுவனங்கள் தொடர்ந்த வழக்கில், இடைக்கால தடை விதிக்க மறுத்த நீதிமன்றம், சக்ரா படம் தொடர்பான இரண்டு வார வசூல் விவரங்கள் மற்றும் இணையத்தில் வெளியிடும் ஒப்பந்தம் ஆகியனவற்றை நீதிமன்றத்தில் தாக்கல் செய்யவேண்டும் என்று உத்தரவிட்டது. அதன் பிறகு இந்த வழக்கு தொடர்பாக எந்த தகவலும் வெளியாகவில்லை.

இந்நிலையில், லைகா நிறுவனத்தால் விஷால் மற்றும் சக்ரா படத்திற்கு எதிராக தாக்கல் செய்யப்பட்ட வழக்கு நீதிமன்றத்தால் கடந்த சில தினங்களுக்கு முன்பாக தள்ளுபடி செய்யப்பட்டது. மேலும், பொய்யான வழக்கை முன்வைத்து விஷாலை துன்புறுத்தியதற்காக லைகா நிறுவனத்திற்கு ரூ.5 லட்சம் அபராதம் விதிக்கவும் நீதிபதி உத்தரவிட்டிருந்தார்.

இதுபோன்ற கதாபாத்திரங்களில் நான் மட்டுமே நடிக்கிறேன்: ஐஸ்வர்யா ராஜேஷ் ஓபன் டாக்!
இந்நிலையில் இந்த தீர்ப்பில் கிடைக்கு ரூ.5 லட்சம் அபராத தொகையை மாணவ மாணவிகள் கல்வி செலவுக்கு வழங்கப் போவதாக நடிகர் விஷால் அறிவித்து உள்ளார். இது குறித்து அவர் கூறும்போது, “தேவி அறக்கட்டளை மூலம் ஆண்டுதோறும் ஏழை மாணவ மாணவிகளுக்கு கல்வி உதவிகள் வழங்கி வருகிறேன். தற்போது கோர்ட்டு அபராதம் விதித்துள்ள ரூ.5 லட்சம் தொகை தேவி அறக்கட்டளை மூலம் மாணவ மாணவியரின் படிப்பு செலவுக்கு முழுமையாக செலவு செய்யப்படும்” என்று தெரிவித்துள்ளார்.

விஷால் தற்போது ஆனந்த் சங்கர் இயக்கத்தில் எனிமி படத்தில் நடித்து முடித்துள்ளார். அவன் இவன் படத்திற்கு பிறகு இரண்டாவது முறையாக ஆர்யாவுடன் இணைந்து இந்தப்படத்தில் நடித்துள்ளார். அடுத்ததாக து.ப.சரவணன் இயக்கும் பெயரிடப்படாத படம் ஒன்றிலும் நடிக்க உள்ளார். மேலும் துப்பறிவாளன் 2 படத்தையும் பாகத்தை இயக்கி நடிக்க உள்ளார் விஷால்.