கொரோனாவிற்கு பிறகு ஓடிடி தளங்களின் வளர்ச்சியால் ஆந்தாலஜி படங்களின் வருகை அதிகரிக்க துவங்கியுள்ளது. பெரிய இயக்குனர்களும், நடிகர்களும் கூட ஆந்தாலஜி படங்களின் மீது ஆர்வம் காட்டி வருகின்றனர். அந்த வகையில் சிம்புதேவன் இயக்கத்தில் 6 ஹீரோக்கள், 6 ஹீரோயின்கள், 6 கதைகள் என ‘கசட தபற‘ என்ற ஆந்தாலஜி படம் உருவாகியுள்ளது.

வடிவேலுவின் இம்சை அரசன் 23ஆம் புலிகேசி படத்தை இயக்கி தமிழ் சினிமாவில் வெற்றி இயக்குனராக வலம் வந்தவர் இயக்குனர் சிம்புதேவன். பேண்டஸி படங்களுக்கு பெயர் போன இவர் இயக்கத்தில் கடைசியாக விஜய் நடிப்பில் புலி படம் வெளியானது. மிகப்பெரிய பொருட் செலவில் விஜய் இரட்டை வேடத்தில் நடித்திருந்த இந்தப்படம் ரசிகர்கள் மத்தியில் எதிரபார்த்த வரவேற்பை பெறவில்லை.

இதனை தொடர்ந்து வடிவேலு நடிப்பில் வெளியாகி மிகப்பெரிய ஹிட்டடித்த இம்சை அரசன் 23ஆம் புலிகேசி படத்தின் இரண்டாம் பாகத்தை இயக்கும் முயற்சிகளில் இறங்கினார். இந்தப்படம் மூலமாக வடிவேலுவும் சினிமாவில் ரீஎன்ட்ரி கொடுக்க ஆயத்தமானார். ஷங்கர் தயாரிப்பில் உருவாக இருந்தது இந்தப்படம். ஆனால் வடிவேலுக்கும், தயாரிப்பு தரப்பிற்கும் இடையே ஏற்பட்ட மனக்கசப்பு காரணமாக இந்த படம் கிடப்பில் போடப்பட்டது.

பாத் டப்பில் ஹாயாக படுத்திருக்கும் ஆண்ட்ரியா: வெளியானது ‘பிசாசு 2’ படத்தின் பர்ஸ்ட் லுக்!
இந்நிலையில் ‘கசடதபற’ என்ற ஆந்தாலஜி படத்தை இயக்கியுள்ளார் சிம்புதேவன் . 6 ஹீரோக்கள் 6 ஹீரோயின்கள் 6 இசையமைப்பாளர்கள் வித்தியாசமான 6 கதைகள் என இந்த படத்தை உருவாக்கியுள்ளார். ஹரிஷ் கல்யாண், சந்தீப் கிஷான், சாந்தனு பாக்யராஜ்,வெங்கட்பிரபு, பிரேம்ஜி அமரன்,பிரியா பவானி சங்கர், ரெஜினா கெஸன்ட்ரா,ஜனனி மற்றும் விஜயலட்சுமி ஆகியோர் இந்த படத்தில் நடித்துள்ளனர்.

வெங்கட்பிரபுவின் பிளாக் டிக்கெட் மற்றும் டிரெட்ண்ட் ஆர்ட்ஸ் ரவிச்சந்திரன் ஆகியோர் இணைந்து இப்படத்தை தயாரித்துள்ளனர். சோனி லைவ் ஓடிடி தளத்தில் இந்தப்படம் நேரடியாக வெளியாக உள்ளது. இந்த மாத இறுதிக்குள் படத்தை வெளியிட முடிவு செய்துள்ளதாக தகவல்கள் வெளியாகியுள்ளன. இதுகுறித்த அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.