அதன்பிறகு ஜடேஜாவுக்கு மட்டுமே அவ்வப்போது XI அணியில் வாய்ப்பு கிடைத்து வந்தது. அஸ்வின் XI அணியிலிருந்து ஓரம்கட்டப்பட்டு வந்தார். இந்த சமயத்தில் 2019ஆம் ஆண்டில் ஆஸ்திரேலிய சுற்றுப் பயணம் மேற்கொண்ட இந்திய அணியில் குல்தீப் யாதவ், ஒரு இன்னிங்ஸில் 5 விக்கெட்களை கைப்பற்றி, வெற்றிக்கு உதவிக்கரமாக இருந்தார்.
இதனைத் தொடர்ந்து பேட்டி கொடுத்த பயிற்சியாளர் ரவி சாஸ்திரி, அஸ்வினை மட்டம்தட்டி, குல்தீபை புகழ்ந்து பேசினார். அது, “ஒவ்வொரு வீரருக்கும் ஒரு காலத்தில் முடிவு வரும். தற்போது குல்தீப் காலம் துவங்கிவிட்டது. வெளிநாடுகளில் நடக்கும் போட்டிகளில் குல்தீப்தான் நம்பர் 1 பௌலர்” என்ற வரிதான்.
‘6 ரன் தேவை’…கடைசி பந்தில் ‘மெகா சிக்ஸர்’ அடித்த டிரென்ட் போல்ட்: வைரல் வீடியோ இதோ!
அஸ்வின் பேட்டி:
இந்த பேட்டியை பார்த்தபிறகு அஸ்வின், கடும் மன உளைச்சலுடன் இருந்தது சமீபத்தில் வெளி உலகிற்குத் தெரிய வந்தது. அதனை அஸ்வினே வெளிப்படையாகப் பேசினார். “ரவி சாஸ்திரி மீது அதிக மதிப்பு உள்ளது. அனைவருக்கும் கருத்து கூற முழு உரிமை இருக்கிறது. ஆனால், அவர் பேட்டிகொடுத்த அந்த நொடி, நான் முற்றிலும் நொறுங்கிவிட்டேன். சக வீரரின் வெற்றியில் மகிழ்ச்சி கொள்பவன் நான். அந்த வகையில் குல்தீப் சிறப்பாக செயல்பட்டதை நினைத்து மகிழ்ச்சியடைந்தேன். ஆஸ்திரேலியாவில் ஸ்பின்னர் 5 விக்கெட்களை எடுப்பது சாதாரண விஷயம் கிடையாது. நான்கூட எடுத்ததில்லை. ஆனாலும், ஒரு வீரரை புகழ்வதற்காக, மற்றவரை கீழே தள்ளக் கூடாது” எனக் கூறினார்.
உருக்கம்:
“குல்தீப்பின் வெற்றியில் மகிழ்ச்சியடைந்து, அவரை வாழ்த்திக் கொண்டாடினால் மட்டுமே நானும் ஒருநாள் வெற்றிபெற முடியும். ஆனால், நான் தூக்கியெறியப்பட்டதாக நினைத்தால், எப்படி கொண்டாட்டத்தில் ஈடுபட முடியும்? உடனே எனது அறைக்குச் சென்றேன். மனைவியிடம் இதனை கூறி ஆறுதல் அடைந்து, பிறகு மீண்டும் வந்து வெற்றிக் கொண்டாட்டத்தில் ஈடுபட்டேன். ஏனென்றால், அது எனது அணியின் வெற்றி” என்றார். இதனைத் தொடர்ந்து, ரவி சாஸ்திரியை பலரும் திட்ட ஆரம்பித்தனர்.
IND vs SA: ‘முதல் டெஸ்ட்’..தோனியின் சாதனையை முறியடிப்பாரா ரிஷப் பந்த்: வாய்ப்பு பிரகாசம்!
ரவி சாஸ்திரி பேட்டி:
இந்நிலையில் இந்த விவகாரம் குறித்து ரவி சாஸ்திரி பேசியுள்ளார். அதில், “தனது பேச்சு அஸ்வினை காயப்படுத்தியிருந்தால் அதற்காக மகிழ்ச்சியடைகிறேன். பயிற்சியாளராக எனது பொறுப்பு, அனைவருக்கும் பிடித்தார்போல் இருப்பது அல்ல. பயிற்சியாளர் ஒருவரை அழைத்து சவால் விட்டால், இனி நான் பயிற்சிக்கே போக மாட்டேன் எனக் கூறுவது ஒரு ரகம். சவாலை ஜெயித்து காட்டுகிறேன் எனக் கூறி கடுமையாக உழைப்பது மற்றொரு ரகம். 2018-19ஆம் ஆண்டில் அஸ்வின் காயத்தால் அவதிப்பட்டார். இதனால், அணியில் ரெகுலராக வாய்ப்பு கிடைக்கவில்லை” எனக் கூறினார்.
மேலும் பேசிய அவர், “குல்தீப் அப்போது, அஸ்வினைவிட சிறப்பாக பந்துவீசினார். அதனால்தான், அவரை புகழ்ந்து பேசினேன். பேருந்துக்கு அடியில் அஸ்வினை தள்ளிவிட்டேன் தான். ஆனால், பேருந்து ஓட்டுனரை மூன்று அடிக்கு முன்னால் நிறுத்த சொல்லிவிட்டேன். இதனால், அஸ்வின் நொறுங்க மாட்டார், இந்த உண்மை எனக்கு மட்டும்தான் தெரியும். மற்றவர்களுக்கு சதிகாரனாகத்தான் தெரிந்திருப்பேன். நான் அன்று அப்படி சொல்லாமல் இருந்திருந்தால், அஸ்வின் தனது உடற்தகுதியை மேம்படுத்தி, இன்று உலகின் தலைசிறந்த பௌலராக இருந்திருக்க மாட்டார். நீங்களே மூன்று வருடத்திற்கு முன்பு இருந்த அஸ்வினையும், தற்போதுள்ள அஸ்வினையும் பாருங்கள். உண்மையை சொல்லி, அவர்களது திறமையை வெளி உலகிற்கு கொண்டு வருவதே எனது பணி” எனத் தெரிவித்தார்.
